Ахзаб

يَٰٓأَيُّهَا ٱلنَّبِيُّ ٱتَّقِ ٱللَّهَ وَلَا تُطِعِ ٱلْكَٰفِرِينَ وَٱلْمُنَٰفِقِينَۚ إِنَّ ٱللَّهَ كَانَ عَلِيمًا حَكِيمࣰا

Уа, ардақты Пайғамбар! Алладан лайықты түрде қорық әрі кәпірлер мен мүнафықтардың тілін алма! Шүбәсіз, Алла – Алим (бәрін білуші), Хаким (әр үкімі мен ісінде көптеген хикметтер болатын асқан даналық иесі).

وَٱتَّبِعْ مَا يُوحَىٰٓ إِلَيْكَ مِن رَّبِّكَۚ إِنَّ ٱللَّهَ كَانَ بِمَا تَعْمَلُونَ خَبِيرࣰا

Сен Раббыңнан өзіңе уахи етілгенді ғана басшылыққа ал. Шүбәсіз, Алла не істеп, не қойып жүргендеріңнен толық хабардар.

وَتَوَكَّلْ عَلَى ٱللَّهِۚ وَكَفَىٰ بِٱللَّهِ وَكِيلࣰا

Бір Аллаға тәуекел ет! Алла қамқоршы ретінде (саған) әбден жеткілікті.

مَّا جَعَلَ ٱللَّهُ لِرَجُلࣲ مِّن قَلْبَيْنِ فِي جَوْفِهِۦۚ وَمَا جَعَلَ أَزْوَٰجَكُمُ ٱلَّٰٓـِٔي تُظَٰهِرُونَ مِنْهُنَّ أُمَّهَٰتِكُمْۚ وَمَا جَعَلَ أَدْعِيَآءَكُمْ أَبْنَآءَكُمْۚ ذَٰلِكُمْ قَوْلُكُم بِأَفْوَٰهِكُمْۖ وَٱللَّهُ يَقُولُ ٱلْحَقَّ وَهُوَ يَهْدِي ٱلسَّبِيلَ

Алла бірде-бір адамның көкірек қуысында (біреуімен Аллаға, екіншісімен өзгелерге иман келтіріп, құлдық ұрсын деп) екі бірдей жүрек жаратпаған. (Надандық дәуіріндегі әдеттеріңе басып): «Сенің арқаң бұдан былай мен үшін анамның арқасындай!» – деу арқылы өздеріңе харам қылған әйелдеріңді де сендердің аналарың қылмады. Сондай-ақ (аттарыңа жазғызып алған) асыранды балаларыңды да өз балаларың қылмады. Міне, мұның бәрі құр ауызбен айтқан негізсіз сөздерің ғана. Алла болса, тек ақиқатты ғана айтады һәм әрдайым тура жолға бағыттайды.

ٱدْعُوهُمْ لِـَٔابَآئِهِمْ هُوَ أَقْسَطُ عِندَ ٱللَّهِۚ فَإِن لَّمْ تَعْلَمُوٓا۟ ءَابَآءَهُمْ فَإِخْوَٰنُكُمْ فِي ٱلدِّينِ وَمَوَٰلِيكُمْۚ وَلَيْسَ عَلَيْكُمْ جُنَاحࣱ فِيمَآ أَخْطَأْتُم بِهِۦ وَلَٰكِن مَّا تَعَمَّدَتْ قُلُوبُكُمْۚ وَكَانَ ٱللَّهُ غَفُورࣰا رَّحِيمًا

Асыранды балаларыңды өз әкелерінің атымен атаңдар. Алланың құзырында ең дұрысы сол. Егер олардың әкелерін білмесеңдер, онда олар діндес бауырларың әрі достарың болады. Олардың атын атағандарыңда (өгей әкелеріне телу арқылы) байқамай қателессеңдер, күнәға қалмайсыңдар, сендер тек жүректеріңдегі ниет-пиғылдарың мен қасақана істерің үшін ғана күнәға батасыңдар. Алла құлдарына өте кешірімді, ерекше мейірімді.

ٱلنَّبِيُّ أَوْلَىٰ بِٱلْمُؤْمِنِينَ مِنْ أَنفُسِهِمْۖ وَأَزْوَٰجُهُۥٓ أُمَّهَٰتُهُمْۗ وَأُو۟لُوا۟ ٱلْأَرْحَامِ بَعْضُهُمْ أَوْلَىٰ بِبَعْضࣲ فِي كِتَٰبِ ٱللَّهِ مِنَ ٱلْمُؤْمِنِينَ وَٱلْمُهَٰجِرِينَ إِلَّآ أَن تَفْعَلُوٓا۟ إِلَىٰٓ أَوْلِيَآئِكُم مَّعْرُوفࣰاۚ كَانَ ذَٰلِكَ فِي ٱلْكِتَٰبِ مَسْطُورࣰا

Пайғамбардың мүміндердегі ақысы һәм оларға деген жанашырлығы, олардың өз ақыларынан әрі жанашырлығынан әлдеқайда артық, сондай-ақ (пайғамбар мүміндерге өз әкелеріндей, тіпті, одан да артық болғандықтан) оның жұбайлары да мүміндердің аналары болып табылады. Алланың Кітабы бойынша ет жақын туыстар бір-біріне (мирасқорлық һәм өзара жәрдемдесу мәселесінде) өзге мүміндер мен мұһажирлерден де жақын тұрады. Сонымен қатар, жақын достарыңа әркез жақсылық жасап, оларға да мал-мүліктеріңнің бір парасын өсиет етіп қалдыра аласыңдар. Алланың кітабында жазылған үкім, міне, осы.

وَإِذْ أَخَذْنَا مِنَ ٱلنَّبِيِّـۧنَ مِيثَٰقَهُمْ وَمِنكَ وَمِن نُّوحࣲ وَإِبْرَٰهِيمَ وَمُوسَىٰ وَعِيسَى ٱبْنِ مَرْيَمَۖ وَأَخَذْنَا مِنْهُم مِّيثَٰقًا غَلِيظࣰا

(Уа, Мұхаммед, есіңде болса,) Біз кезінде пайғамбарлардан (атқаратын міндеттеріне қатысты) берік уағда алған едік. Әсіресе, сенен, Нұхтан, Ибраһимнен, Мұсадан және Мәриямұлы Исадан. Иә, олардан өте ауыр серт алған едік.

لِّيَسْـَٔلَ ٱلصَّٰدِقِينَ عَن صِدْقِهِمْۚ وَأَعَدَّ لِلْكَٰفِرِينَ عَذَابًا أَلِيمࣰا

Әлбетте, Алла сөздерінде тұрған шыншылдардан, шыншылдықтарына сеніп тапсырылған аманатты сұрайды. Сондай-ақ Ол кәпірлерге жан төзгісіз азап әзірледі.

يَٰٓأَيُّهَا ٱلَّذِينَ ءَامَنُوا۟ ٱذْكُرُوا۟ نِعْمَةَ ٱللَّهِ عَلَيْكُمْ إِذْ جَآءَتْكُمْ جُنُودࣱ فَأَرْسَلْنَا عَلَيْهِمْ رِيحࣰا وَجُنُودࣰا لَّمْ تَرَوْهَاۚ وَكَانَ ٱللَّهُ بِمَا تَعْمَلُونَ بَصِيرًا

Уа, иман келтіргендер! Алланың өздеріңе нәсіп еткен нығметін естеріңе алыңдар. Естеріңде болса, мүшріктердің біріккен қалың қолы (көздеріңді біржолата жою үшін) өздеріңе төніп келгенде, Біз оларға қарсы (қосындарын жермен-жексен еткен) дүлей дауыл мен көздеріңе көрінбейтін қалың әскер жібердік. Сол кезде Алла не істеп, не қойғандарыңның бәрін анық көрген еді.

إِذْ جَآءُوكُم مِّن فَوْقِكُمْ وَمِنْ أَسْفَلَ مِنكُمْ وَإِذْ زَاغَتِ ٱلْأَبْصَٰرُ وَبَلَغَتِ ٱلْقُلُوبُ ٱلْحَنَاجِرَ وَتَظُنُّونَ بِٱللَّهِ ٱلظُّنُونَا۠

Сонда біріккен жау қолы сендерге жоғарғы жақтан да, төменгі жақтан да төніп келіп, құрсап алған еді. Сол кезде көздер шарасынан шығып, жүректер ауызға тығылып, жан алқымға келген болатын. Сөйтіп, Алла жайлы сан түрлі жағымсыз ойларға қалған (берілген) едіңдер.

هُنَالِكَ ٱبْتُلِيَ ٱلْمُؤْمِنُونَ وَزُلْزِلُوا۟ زِلْزَالࣰا شَدِيدࣰا

Міне сонда мүміндер өте ауыр сынаққа тап болды (да кімнің шынайы мүмін, кімнің екіжүзді мұнафық екені анықталды) және (бейне бір алапат зілзалаға тап болғандай) жан дүниелері қатты шайқалып, қатты толқулы болды.

وَإِذْ يَقُولُ ٱلْمُنَٰفِقُونَ وَٱلَّذِينَ فِي قُلُوبِهِم مَّرَضࣱ مَّا وَعَدَنَا ٱللَّهُ وَرَسُولُهُۥٓ إِلَّا غُرُورࣰا

Сол бір қиын шақта екіжүзді мұнафықтар мен жүректерінде кеселі барлар (яғни, иманы әлсіздер): «Демек, Алла және Оның елшісі («келешекте бәрінен үстем боласыңдар» деп) бізді құрғақ уәдемен алдарқатқан екен ғой!» – деп, айтқан еді.

وَإِذْ قَالَت طَّآئِفَةࣱ مِّنْهُمْ يَٰٓأَهْلَ يَثْرِبَ لَا مُقَامَ لَكُمْ فَٱرْجِعُوا۟ۚ وَيَسْتَـْٔذِنُ فَرِيقࣱ مِّنْهُمُ ٱلنَّبِيَّ يَقُولُونَ إِنَّ بُيُوتَنَا عَوْرَةࣱ وَمَا هِيَ بِعَوْرَةٍۖ إِن يُرِيدُونَ إِلَّا فِرَارࣰا

Сондай-ақ олардың арасындағы (соғыстан зәре-құты қашқан) бір топ: «Уа, Ясриб халқы! Енді сендер үшін бұл жерде дұшпанға қарсы шеп құрудың ешқандай мағынасы жоқ. (Мынадай жойқын күшке төтеп бере алмайтындықтарың айтпаса да түсінікті), одан да (аман тұрғандарыңда) үйлеріңе қайтыңдар!» – десе, енді бір топ: «Үй-жайларымыз қорғансыз қалды», – деп сылтауратып, пайғамбардан жамырап рұқсат сұрап жатты. Әйтсе де олардың үй-жайлары қорғансыз емес еді. Анығында, олардың бар көксегені жауға ту сыртын беріп, соғыс майданынан қашу болатын.

وَلَوْ دُخِلَتْ عَلَيْهِم مِّنْ أَقْطَارِهَا ثُمَّ سُئِلُوا۟ ٱلْفِتْنَةَ لَـَٔاتَوْهَا وَمَا تَلَبَّثُوا۟ بِهَآ إِلَّا يَسِيرࣰا

Демек, оларға шаһардың тұс-тұсынан, шынымен, толассыз шабуыл жасалса әрі олардан Ислам дінінен безіп, мұсылмандар арасына лаң салу талап етілсе, көп ойланып жатпастан ондай сұмдық іске де барар еді.

وَلَقَدْ كَانُوا۟ عَٰهَدُوا۟ ٱللَّهَ مِن قَبْلُ لَا يُوَلُّونَ ٱلْأَدْبَٰرَۚ وَكَانَ عَهْدُ ٱللَّهِ مَسْـُٔولࣰا

Анығында, олар бұдан бұрын (пайғамбарға қол беріп) дұшпанмен бетпе-бет келгендерінде, әсте ту сыртын беріп, қашпайтындықтарын айтып, Аллаға серт берген-ді. Аллаға берілген серт үлкен жауапкершілікті талап етеді, ендеше, олар серттерін бұзғаны үшін жауапқа тартылады.

قُل لَّن يَنفَعَكُمُ ٱلْفِرَارُ إِن فَرَرْتُم مِّنَ ٱلْمَوْتِ أَوِ ٱلْقَتْلِ وَإِذࣰا لَّا تُمَتَّعُونَ إِلَّا قَلِيلࣰا

(Уа, Мұхаммед!) Оларға: «Егер өлімнен немесе жау қолынан қаза табудан қорқып, қашатын болсаңдар, өйтіп қашқанның сендерге әсте пайдасы тимейді. Әзірге қашып құтылғанмен, бәрібір (ғұмыр жастарың ұзармайды, күндерің санаулы болғандықтан) қу тіршіліктің қызығын көп көрмейсіңдер», – деп айт.

قُلْ مَن ذَا ٱلَّذِي يَعْصِمُكُم مِّنَ ٱللَّهِ إِنْ أَرَادَ بِكُمْ سُوٓءًا أَوْ أَرَادَ بِكُمْ رَحْمَةࣰۚ وَلَا يَجِدُونَ لَهُم مِّن دُونِ ٱللَّهِ وَلِيࣰّا وَلَا نَصِيرࣰا

Сондай-ақ оларға: «Егер Алла бастарыңды бәлеге қалдыруды қаласа немесе сендерді рақымына бөлегісі келсе, Одан сендерді кім қорғап қала алады, яки Оған кім бөгет бола алады?!» – де. Егер Алла оларды (пенделерін) назарынан мүлдем тыс қалдыратын болса, онда олар өздеріне Алладан басқа қамқор ие де, жәрдемші де таба алмайды.

۞قَدْ يَعْلَمُ ٱللَّهُ ٱلْمُعَوِّقِينَ مِنكُمْ وَٱلْقَآئِلِينَ لِإِخْوَٰنِهِمْ هَلُمَّ إِلَيْنَاۖ وَلَا يَأْتُونَ ٱلْبَأْسَ إِلَّا قَلِيلًا

Алла араларыңдағы өздерімен қоймай өзгелерді де соғыстан айнытуға тырысатындарды және бауырларына: «Бастарыңды құр босқа қатерге тігіп қайтесіңдер, одан да келіңдер, бізге қосылыңдар!» – дейтіндерді, әлбетте, біледі. Олар онсыз да (елдің көзіне түсу әрі олжаға кенелу үшін) соғысқа тиіп-қашып қана қатысады (немесе олардың соғысқа қатысатындары некен-саяқ қана).

أَشِحَّةً عَلَيْكُمْۖ فَإِذَا جَآءَ ٱلْخَوْفُ رَأَيْتَهُمْ يَنظُرُونَ إِلَيْكَ تَدُورُ أَعْيُنُهُمْ كَٱلَّذِي يُغْشَىٰ عَلَيْهِ مِنَ ٱلْمَوْتِۖ فَإِذَا ذَهَبَ ٱلْخَوْفُ سَلَقُوكُم بِأَلْسِنَةٍ حِدَادٍ أَشِحَّةً عَلَى ٱلْخَيْرِۚ أُو۟لَٰٓئِكَ لَمْ يُؤْمِنُوا۟ فَأَحْبَطَ ٱللَّهُ أَعْمَٰلَهُمْۚ وَكَانَ ذَٰلِكَ عَلَى ٱللَّهِ يَسِيرࣰا

Олар сендерге (қолұшын беруге әрі Алла жолында бір нәрсе істеуге келгенде) өте сараң һәм құлықсыз болады. Ал соғыс әбден қызып, бойларын үрей билегенде, бейне бір жаны алқымына тіреліп, өлейін деп жатқан жандай көздері шарасынан шығып, өзіңе телміре қарағанын көресің. Ал соғыс бітіп, үрейден толық арылғанда, (бәрін өздері тындырғандай) сараңдықтары ұстап, түскен олжаны өздеріңнен өлгенше қызғанып, сендерді біздей өткір тілдерімен түйреп, жандарыңа бататын зәрлі сөздер айтады. Міне, солар, шынымен, иман етпегендер, сол үшін Алла олардың (дүниеге қызығып немесе ел-жұртқа көз қылып істеген) барлық істерін зая қылды. Бұл Алла үшін оп-оңай.

يَحْسَبُونَ ٱلْأَحْزَابَ لَمْ يَذْهَبُوا۟ۖ وَإِن يَأْتِ ٱلْأَحْزَابُ يَوَدُّوا۟ لَوْ أَنَّهُم بَادُونَ فِي ٱلْأَعْرَابِ يَسْـَٔلُونَ عَنْ أَنۢبَآئِكُمْۖ وَلَوْ كَانُوا۟ فِيكُم مَّا قَٰتَلُوٓا۟ إِلَّا قَلِيلࣰا

Біріккен жау қолынан мұнафықтардың қорқып қалғаны соншалық, оларды әлі кете қойған жоқ деп ойлайды. Егер мүшріктердің біріккен қолы қайта келіп, құрсау салар болса, онда олар (әншейінде бармайтын) шөл даладағы бәдәуилерді паналап, хабар-ошарларыңды алыстан сұрастырып біліп, жайбарақат отыра беруді көксер еді. Ал араларыңда болған күннің өзінде, (ел-жұртқа көз қылып) тиіп-қашып қана соғысар еді.

لَّقَدْ كَانَ لَكُمْ فِي رَسُولِ ٱللَّهِ أُسْوَةٌ حَسَنَةࣱ لِّمَن كَانَ يَرْجُوا۟ ٱللَّهَ وَٱلْيَوْمَ ٱلْـَٔاخِرَ وَذَكَرَ ٱللَّهَ كَثِيرࣰا

Шүбәсіз, Алла елшісінде сендер үшін әрі Аллаға және ақирет күніне бар үмітін артқан (Алланы және ақирет күнін жан-тәнімен қалайтын) һәм Алланы көп еске алып, Оған көп құлшылық ететіндер үшін қай жағынан алсақ та, теңдессіз үлгі-өнеге бар.

وَلَمَّا رَءَا ٱلْمُؤْمِنُونَ ٱلْأَحْزَابَ قَالُوا۟ هَٰذَا مَا وَعَدَنَا ٱللَّهُ وَرَسُولُهُۥ وَصَدَقَ ٱللَّهُ وَرَسُولُهُۥۚ وَمَا زَادَهُمْ إِلَّآ إِيمَٰنࣰا وَتَسْلِيمࣰا

Ал мүміндер мүшріктердің жер қайысқан қолын көргенде: «Міне, бұл Алла мен елшісінің бізге уәде еткен нәрсесі. Алла да, Оның елшісі де әрдайым рас айтады», – деді. Бұл олардың иманы мен мұсылмандығын одан сайын күшейте түсті.

مِّنَ ٱلْمُؤْمِنِينَ رِجَالࣱ صَدَقُوا۟ مَا عَٰهَدُوا۟ ٱللَّهَ عَلَيْهِۖ فَمِنْهُم مَّن قَضَىٰ نَحْبَهُۥ وَمِنْهُم مَّن يَنتَظِرُۖ وَمَا بَدَّلُوا۟ تَبْدِيلࣰا

Мүміндердің арасында Аллаға берген сертінде тұрған нағыз ерлер бар. Олардың кейбірі уәдесінде тұрып, (Алла жолында) жанын пида қылды. Енді біреуі (өз кезегін) күтуде. Олар серттерінен әсте тайған да, әуелгі қалыптарынан еш айныған да емес.

لِّيَجْزِيَ ٱللَّهُ ٱلصَّٰدِقِينَ بِصِدْقِهِمْ وَيُعَذِّبَ ٱلْمُنَٰفِقِينَ إِن شَآءَ أَوْ يَتُوبَ عَلَيْهِمْۚ إِنَّ ٱللَّهَ كَانَ غَفُورࣰا رَّحِيمࣰا

Міне, осылайша Алла шыншылдарды шыншылдықтары үшін ерекше сый-сияпатқа бөлейді. Ал екіжүзді мұнафықтарды қаласа, азаптайды, не болмаса оларға тәубеге келуді нәсіп етіп, тәубелерін қабыл алады. Шүбәсіз, Алла – өте кешірімді (әсіресе, тәубеге келіп, Өзіне бет бұрған құлдарына) ерекше мейірімді.

وَرَدَّ ٱللَّهُ ٱلَّذِينَ كَفَرُوا۟ بِغَيْظِهِمْ لَمْ يَنَالُوا۟ خَيْرࣰاۚ وَكَفَى ٱللَّهُ ٱلْمُؤْمِنِينَ ٱلْقِتَالَۚ وَكَانَ ٱللَّهُ قَوِيًّا عَزِيزࣰا

Алла кәпірлердің одақтасқан қолын діттеген мақсаттарына жеткізбей, оларды ашу-ызаға булыққан күйлерінде құралақан қайтарды. (Осылайша Алла мүміндерді кескілескен шайқассыз-ақ жеңіске жеткізді) Сөйтіп Алланың жәрдемі мүміндерге жеткілікті болды. Алла – Қауи (тым күшті), Азиз (бәрінен үстем әрі ұлы).

وَأَنزَلَ ٱلَّذِينَ ظَٰهَرُوهُم مِّنْ أَهْلِ ٱلْكِتَٰبِ مِن صَيَاصِيهِمْ وَقَذَفَ فِي قُلُوبِهِمُ ٱلرُّعْبَ فَرِيقࣰا تَقْتُلُونَ وَتَأْسِرُونَ فَرِيقࣰا

Сондай-ақ кітап иелерінен мүшріктерге болысып, мұсылмандарға опасыздық жасағандарды (Бәну Құрайза тайпасын) қамалдарынан түсіріп, жүректеріне үрей салды. Сонда олардың бір парасын өлім жазасына бұйырып, енді бір тобын тұтқынға алған едіңдер.

وَأَوْرَثَكُمْ أَرْضَهُمْ وَدِيَٰرَهُمْ وَأَمْوَٰلَهُمْ وَأَرْضࣰا لَّمْ تَطَـُٔوهَاۚ وَكَانَ ٱللَّهُ عَلَىٰ كُلِّ شَيْءࣲ قَدِيرࣰا

Сөйтіп, (Алла) сендерді олардың жерлеріне, үй-жайларына, мал-мүліктеріне, сондай-ақ бұрын-соңды аяқтарың баспаған (Хайбар) жеріне мұрагер қылды. Алланың құдіреті барлық нәрсеге толық жетеді.

يَٰٓأَيُّهَا ٱلنَّبِيُّ قُل لِّأَزْوَٰجِكَ إِن كُنتُنَّ تُرِدْنَ ٱلْحَيَوٰةَ ٱلدُّنْيَا وَزِينَتَهَا فَتَعَالَيْنَ أُمَتِّعْكُنَّ وَأُسَرِّحْكُنَّ سَرَاحࣰا جَمِيلࣰا

Уа, ардақты Пайғамбар! Жұбайларыңа: «Егер қалағандарың дүниенің қу тіршілігі мен сән-салтанаты болса, келіңдер, тиісті дүниелеріңді (ақыларың мен сый-сияпаттарыңды) берейін де бәріңе талақ айтып, жақсылықпен (абыроймен) қоя берейін».

وَإِن كُنتُنَّ تُرِدْنَ ٱللَّهَ وَرَسُولَهُۥ وَٱلدَّارَ ٱلْـَٔاخِرَةَ فَإِنَّ ٱللَّهَ أَعَدَّ لِلْمُحْسِنَٰتِ مِنكُنَّ أَجْرًا عَظِيمࣰا

Ал егер Алланы, елшісін һәм мәңгілік ақирет мекенін қаласаңдар, онда біліп қойыңдар, Алла араларыңдағы (Раббысын көріп тұрғандай әр қадамын аңдап басатын) игілікке құштар ізгі жандарға зор сауап, үлкен сый-сияпат дайындап қойды.

يَٰنِسَآءَ ٱلنَّبِيِّ مَن يَأْتِ مِنكُنَّ بِفَٰحِشَةࣲ مُّبَيِّنَةࣲ يُضَٰعَفْ لَهَا ٱلْعَذَابُ ضِعْفَيْنِۚ وَكَانَ ذَٰلِكَ عَلَى ٱللَّهِ يَسِيرࣰا

Уа, Пайғамбар жұбайлары! Араларыңнан кімде-кім (пайғамбарды ренжіту, ғайбат, өсек айту және жала жабу сынды) ашық арсыздыққа барып, күнәға батса, оның азабы екі еселенеді. Бұл Алла үшін оп-оңай.

۞وَمَن يَقْنُتْ مِنكُنَّ لِلَّهِ وَرَسُولِهِۦ وَتَعْمَلْ صَٰلِحࣰا نُّؤْتِهَآ أَجْرَهَا مَرَّتَيْنِ وَأَعْتَدْنَا لَهَا رِزْقࣰا كَرِيمࣰا

Ал араларыңнан кімде-кім Аллаға және елшісіне шын жүректен мойынсұнса, әрі (өзінің һәм өзгелердің жақсылығы үшін) игілікті істер істесе, оның сауабын екі есеге арттырамыз және ол үшін (жаннатта) сондай керім (мол, берекелі, зиянсыз әрі қайырлы) ризық-несібе дайындап қоямыз.

يَٰنِسَآءَ ٱلنَّبِيِّ لَسْتُنَّ كَأَحَدࣲ مِّنَ ٱلنِّسَآءِ إِنِ ٱتَّقَيْتُنَّۚ فَلَا تَخْضَعْنَ بِٱلْقَوْلِ فَيَطْمَعَ ٱلَّذِي فِي قَلْبِهِۦ مَرَضࣱ وَقُلْنَ قَوْلࣰا مَّعْرُوفࣰا

Уа, Пайғамбардың жұбайлары! Сендер өзге әйелдер секілді емессіңдер, (сендердің орындарың басқа әйелдерден бөлек); сендер Алланы лайықты түрде ұлықтауға, Оған қарсы келуден барынша сақтануға һәм өздеріңе лайықсыз іс-әрекеттерден аулақ болуға тиіссіңдер. Міне, сондықтан да (бөтен ер адамдарға тіл қатқандарыңда) қылымсып, назданып сөйлемеңдер. Жүрегінде дерті бар (әйелқұмар) әлдекім (шайтанның уәсуәсіне еріп) өздеріңнен дәмеленіп жүрмесін. Сөйлеген сөздерің жақсы әрі салмақты болсын.

وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ ٱلْجَٰهِلِيَّةِ ٱلْأُولَىٰۖ وَأَقِمْنَ ٱلصَّلَوٰةَ وَءَاتِينَ ٱلزَّكَوٰةَ وَأَطِعْنَ ٱللَّهَ وَرَسُولَهُۥٓۚ إِنَّمَا يُرِيدُ ٱللَّهُ لِيُذْهِبَ عَنكُمُ ٱلرِّجْسَ أَهْلَ ٱلْبَيْتِ وَيُطَهِّرَكُمْ تَطْهِيرࣰا

(Сыртта маңызды шаруаларың болмаса) байсалдылық сақтап, үйлеріңде отырыңдар, (ал сыртқа шығу қажет болған жағдайда) Исламнан бұрынғы надандық дәуіріндегідей сәнденіп, сымбат-көріктеріңді ел-жұртқа паш етіп шықпаңдар. Намазды кемеліне келтіріп, уақытылы әрі үзбей оқыңдар, зекеттеріңді толық беріңдер, қысқасы, Аллаға және елшісіне (не бұйырса да, не нәрседен тыйса да) қалтқысыз мойынсұныңдар! Уа, Пайғамбар отбасы! Алла сендерді настық атаулыдан толық арылтып, әбден тазартып, пәк етуді қалайды.

وَٱذْكُرْنَ مَا يُتْلَىٰ فِي بُيُوتِكُنَّ مِنْ ءَايَٰتِ ٱللَّهِ وَٱلْحِكْمَةِۚ إِنَّ ٱللَّهَ كَانَ لَطِيفًا خَبِيرًا

Үйлеріңде оқылып жатқан Алланың аяттарын және пайғамбар хикметін (сүннеттерін) жадыларыңа жақсылап түйіп алыңдар! Шүбәсіз, Алла – Латиф (шексіз ілімімен жүрек түкпірінде жатқан ең құпия сырлардың бәрін білуші), Хабир (бәрінен толық хабардар болушы).

إِنَّ ٱلْمُسْلِمِينَ وَٱلْمُسْلِمَٰتِ وَٱلْمُؤْمِنِينَ وَٱلْمُؤْمِنَٰتِ وَٱلْقَٰنِتِينَ وَٱلْقَٰنِتَٰتِ وَٱلصَّٰدِقِينَ وَٱلصَّٰدِقَٰتِ وَٱلصَّٰبِرِينَ وَٱلصَّٰبِرَٰتِ وَٱلْخَٰشِعِينَ وَٱلْخَٰشِعَٰتِ وَٱلْمُتَصَدِّقِينَ وَٱلْمُتَصَدِّقَٰتِ وَٱلصَّٰٓئِمِينَ وَٱلصَّٰٓئِمَٰتِ وَٱلْحَٰفِظِينَ فُرُوجَهُمْ وَٱلْحَٰفِظَٰتِ وَٱلذَّٰكِرِينَ ٱللَّهَ كَثِيرࣰا وَٱلذَّٰكِرَٰتِ أَعَدَّ ٱللَّهُ لَهُم مَّغْفِرَةࣰ وَأَجْرًا عَظِيمࣰا

Аллаға мойынсұнған мұсылман ерлер мен мұсылман әйелдер; шын жүректен иман келтірген мүмін ерлер мен мүмін әйелдер; (Хақ діннің барлық үкімдеріне) қалтқысыз бағынған ерлер мен қалтқысыз бағынған әйелдер; (сөздері мен іс-әрекеттері) түзу әрі шынайы болған шыншыл ерлер мен шынайы да шыншыл әйелдер; сабырлы да табанды ерлер мен сабырлы да табанды әйелдер; (Алланың алдында) өте ізетті әрі кішіпейіл болған ерлер мен сондай инабатшыл әрі кішіпейіл болған әйелдер; (Алла жолында мұқтаждарға) зекет-садақа беретін ерлер мен зекет-садақа беретін әйелдер; ораза ұстайтын ерлер мен ораза ұстайтын әйелдер; арын сақтап, абиырларын күнәдан тыйған ерлер мен арын сақтап, абиырларын күнәдан тыйған әйелдер; сондай-ақ Алланы көп еске алатын ерлер мен Алланы көп еске алатын әйелдер (бар ғой?!) Міне, Алла осынау ізгі жандарға ерекше кешірім мен үлкен сый-сияпат дайындап қойды.

وَمَا كَانَ لِمُؤْمِنࣲ وَلَا مُؤْمِنَةٍ إِذَا قَضَى ٱللَّهُ وَرَسُولُهُۥٓ أَمْرًا أَن يَكُونَ لَهُمُ ٱلْخِيَرَةُ مِنْ أَمْرِهِمْۗ وَمَن يَعْصِ ٱللَّهَ وَرَسُولَهُۥ فَقَدْ ضَلَّ ضَلَٰلࣰا مُّبِينࣰا

Алла және елшісі қандай да бір мәселеге қатысты кесімді үкім айтқанда, бірде-бір мүмін ер адам мен мүмін әйелдің өздеріне тікелей қатысы болған сол мәселеде (Алла мен елшісінің үкімін былай қалдырып, басқа үкімді) таңдау құқығы жоқ. Кімде-кім Аллаға және елшісіне қарсы келіп, асылық қылса, онда ол анық адасушылыққа ұрынды деген сөз.

وَإِذْ تَقُولُ لِلَّذِيٓ أَنْعَمَ ٱللَّهُ عَلَيْهِ وَأَنْعَمْتَ عَلَيْهِ أَمْسِكْ عَلَيْكَ زَوْجَكَ وَٱتَّقِ ٱللَّهَ وَتُخْفِي فِي نَفْسِكَ مَا ٱللَّهُ مُبْدِيهِ وَتَخْشَى ٱلنَّاسَ وَٱللَّهُ أَحَقُّ أَن تَخْشَىٰهُۖ فَلَمَّا قَضَىٰ زَيْدࣱ مِّنْهَا وَطَرࣰا زَوَّجْنَٰكَهَا لِكَيْ لَا يَكُونَ عَلَى ٱلْمُؤْمِنِينَ حَرَجࣱ فِيٓ أَزْوَٰجِ أَدْعِيَآئِهِمْ إِذَا قَضَوْا۟ مِنْهُنَّ وَطَرࣰاۚ وَكَانَ أَمْرُ ٱللَّهِ مَفْعُولࣰا

(Уа, Мұхаммед!) Алла нығметіне бөлеген, өзің де көп жақсылық жасаған адамың (әйелімен ажырасуды ұйғарып, алдыңнан өтейін деп келгенде) оған: «Әйеліңнен ажырама, Алладан қорық!»– деген едің. Сөйтіп, Алланың Өзі жарияға әйгілейін деп тұрған ақиқатты ішіңе бүгіп қалдың. Ел-жұрттан (бұл мәселені ә дегенде дұрыс түсінбей қала ма деп) имендің. Дегенмен, Алладан қорыққаның әлдеқайда абзал еді. Содан, Зәйд әйелімен біржола ажырасқан кезде оның талақ еткен әйелін (ғиддат мерзімі толған соң) саған қостық. Біз мұны мүміндердің асыранды балалары өз әйелдерімен біржола ажырасқан кезде, өгей балаларының талақ еткен әйелдерін алу мәселесінде (мұнымыз күнә немесе ұят болмас па екен деп) қиналмау үшін істедік. Алланың әмірі сөзсіз орындалуға тиіс.

مَّا كَانَ عَلَى ٱلنَّبِيِّ مِنْ حَرَجࣲ فِيمَا فَرَضَ ٱللَّهُ لَهُۥۖ سُنَّةَ ٱللَّهِ فِي ٱلَّذِينَ خَلَوْا۟ مِن قَبْلُۚ وَكَانَ أَمْرُ ٱللَّهِ قَدَرࣰا مَّقْدُورًا

Пайғамбарға Алланың өзіне бұйырған әрі адал еткен ісін орындауда ешқандай қиындық, тыйым немесе кедергі болмауы керек. Алланың бұдан бұрын өткен пайғамбарларға қатысты жазуы да, ісі де сондай болған. Алланың әмірі – әу бастан кесілген (міндетті түрде жүзеге асатын әрі әсте өзгермейтін) кесімді тағдыр.

ٱلَّذِينَ يُبَلِّغُونَ رِسَٰلَٰتِ ٱللَّهِ وَيَخْشَوْنَهُۥ وَلَا يَخْشَوْنَ أَحَدًا إِلَّا ٱللَّهَۗ وَكَفَىٰ بِٱللَّهِ حَسِيبࣰا

Ол пайғамбарлар Алланың жолдауларын (әмір-пәрмендерін) айна-қатесіз жеткізеді һәм (міндеттерін атқару барысында) Одан ғана именеді. Олар Алладан басқа ешкімнен именбейді. Жауапқа тартушы (әрі құлдарының істерін бағалаушы) ретінде бір Алла жетеді.

مَّا كَانَ مُحَمَّدٌ أَبَآ أَحَدࣲ مِّن رِّجَالِكُمْ وَلَٰكِن رَّسُولَ ٱللَّهِ وَخَاتَمَ ٱلنَّبِيِّـۧنَۗ وَكَانَ ٱللَّهُ بِكُلِّ شَيْءٍ عَلِيمࣰا

Мұхаммед араларыңдағы бірде-бір еркек кіндіктінің әкесі емес. Ол Алланың елшісі һәм ең соңғы пайғамбар. Алла барлық нәрсені білуші (біледі).

يَٰٓأَيُّهَا ٱلَّذِينَ ءَامَنُوا۟ ٱذْكُرُوا۟ ٱللَّهَ ذِكْرࣰا كَثِيرࣰا

Уа, иман келтіргендер! Алланы көп еске алыңдар!

وَسَبِّحُوهُ بُكْرَةࣰ وَأَصِيلًا

Оны (мінсізсің, кемшілік атаулыдан, орынсыз іс істеп, лайықсыз үкім шығарудан, әрі Өзің жаратқан жаратылысқа ұқсаудан) пәксің деп, ертелі-кеш ұлықтаңдар!

هُوَ ٱلَّذِي يُصَلِّي عَلَيْكُمْ وَمَلَٰٓئِكَتُهُۥ لِيُخْرِجَكُم مِّنَ ٱلظُّلُمَٰتِ إِلَى ٱلنُّورِۚ وَكَانَ بِٱلْمُؤْمِنِينَ رَحِيمࣰا

Алла сендерді (ой-сананы, жүректі әрі жан дүниені шырмайтын) тас қараңғы түнектерден жарық нұрға шығару үшін сендерге шексіз рақымы мен нығметін төгеді. Періштелері де (сол мақсатта) сендер үшін дұға етіп, Алладан кешірім тілейді. Шүбәсіз, Алла мүмін құлдарына ерекше мейірімді!

تَحِيَّتُهُمْ يَوْمَ يَلْقَوْنَهُۥ سَلَٰمࣱۚ وَأَعَدَّ لَهُمْ أَجْرࣰا كَرِيمࣰا

Олар Алламен қауышатын күні «(қайғы-мұңнан, азаптан біржолата құтылып) мәңгілікте аман-есен болыңдар», деген ізгі тілекпен қарсы алынады. Алла олар үшін сондай керім (мол, берекелі, зиянсыз әрі қайырлы) сый-сияпат дайындап қойды.

يَٰٓأَيُّهَا ٱلنَّبِيُّ إِنَّآ أَرْسَلْنَٰكَ شَٰهِدࣰا وَمُبَشِّرࣰا وَنَذِيرࣰا

Уа, Мұхаммед! Біз сені (ғибратты ғұмырыңмен ақиқатқа һәм қиямет күні үмбетіңе) куә болушы, (иман келтіріп, игілікті істер істеген ізгі жандарды) сүйіншілеуші әрі (кәпірлер мен тура жолдан адасқандарды) ескертуші етіп жібердік.

وَدَاعِيًا إِلَى ٱللَّهِ بِإِذْنِهِۦ وَسِرَاجࣰا مُّنِيرࣰا

Сондай-ақ (жындар мен адамдарды) Алланың жолына Оның рұқсатымен шақырушы әрі нұр шашқан жарық шам-шырақ етіп жібердік.

وَبَشِّرِ ٱلْمُؤْمِنِينَ بِأَنَّ لَهُم مِّنَ ٱللَّهِ فَضْلࣰا كَبِيرࣰا

Ендеше, (өзің шашқан нұрдың жарығымен тура жолға түскен) мүміндерді сүйіншіле! Оларға Алланың зор шарапаты тиеді!

وَلَا تُطِعِ ٱلْكَٰفِرِينَ وَٱلْمُنَٰفِقِينَ وَدَعْ أَذَىٰهُمْ وَتَوَكَّلْ عَلَى ٱللَّهِۚ وَكَفَىٰ بِٱللَّهِ وَكِيلࣰا

Кәпірлер мен мұнафықтарды тыңдама (олардың Исламға қайшы ұсыныстарына құлақ аспа). Сонымен қатар, олардың өзіңе көрсеткен зәбір-жапасын көңіліңе алма. Бір Аллаға тәуекел ет! Алла қамқор ие ретінде (саған) әбден жеткілікті.

يَٰٓأَيُّهَا ٱلَّذِينَ ءَامَنُوٓا۟ إِذَا نَكَحْتُمُ ٱلْمُؤْمِنَٰتِ ثُمَّ طَلَّقْتُمُوهُنَّ مِن قَبْلِ أَن تَمَسُّوهُنَّ فَمَا لَكُمْ عَلَيْهِنَّ مِنْ عِدَّةࣲ تَعْتَدُّونَهَاۖ فَمَتِّعُوهُنَّ وَسَرِّحُوهُنَّ سَرَاحࣰا جَمِيلࣰا

Уа, иман келтіргендер! Мүмін (яғни, мұсылман, христиан немесе еврей) әйелдермен некелескеннен кейін олармен жақындаспай тұрып талақ айтсаңдар, онда олардан (басқа біреуге күйеуге шыға алуы үшін) ғиддат (яғни, үш етеккір) мерзімін күтуді талап етуге қақыларың жоқ. Оларға (егер мәһірі тағайындалған болса, оның жоқ дегенде тең жартысын, ал тағайындалмаса) сый-сияпаттарын беріп, жақсылықпен, абыроймен жөніне жіберіңдер.

يَٰٓأَيُّهَا ٱلنَّبِيُّ إِنَّآ أَحْلَلْنَا لَكَ أَزْوَٰجَكَ ٱلَّٰتِيٓ ءَاتَيْتَ أُجُورَهُنَّ وَمَا مَلَكَتْ يَمِينُكَ مِمَّآ أَفَآءَ ٱللَّهُ عَلَيْكَ وَبَنَاتِ عَمِّكَ وَبَنَاتِ عَمَّٰتِكَ وَبَنَاتِ خَالِكَ وَبَنَاتِ خَٰلَٰتِكَ ٱلَّٰتِي هَاجَرْنَ مَعَكَ وَٱمْرَأَةࣰ مُّؤْمِنَةً إِن وَهَبَتْ نَفْسَهَا لِلنَّبِيِّ إِنْ أَرَادَ ٱلنَّبِيُّ أَن يَسْتَنكِحَهَا خَالِصَةࣰ لَّكَ مِن دُونِ ٱلْمُؤْمِنِينَۗ قَدْ عَلِمْنَا مَا فَرَضْنَا عَلَيْهِمْ فِيٓ أَزْوَٰجِهِمْ وَمَا مَلَكَتْ أَيْمَٰنُهُمْ لِكَيْلَا يَكُونَ عَلَيْكَ حَرَجࣱۗ وَكَانَ ٱللَّهُ غَفُورࣰا رَّحِيمࣰا

Уа, ардақты Пайғамбар! Біз саған мәһірін берген әйелдеріңді, соғыстан түскен олжа ретінде Алланың өзіңе нәсіп еткен күңдеріңді, өзіңмен бірге Алла жолында (Мәдинаға) қоныс аударған әкеңнің бауырлары мен апа-қарындастарының қыздарын және анаңның бауырлары мен апа-сіңілілерінің қыздарын адал еттік, сондай-ақ мәһір сұрамай-ақ өзін пайғамбарға бағыштаған мүмін әйелді – әрине, егер пайғамбар онымен некелесуді қаласа – адал қылдық. Бұл соңғы үкім – өзге мүміндерді былай қойғанда, өзіңе ғана тән. Ал мүміндерге әйелдері мен қол астындағы күңдеріне қатысты не бұйырғанымызды бұдан бұрын білдірген едік. Ендеше, бұл үкім (яғни, мәһір атамай-ақ әйел алу, пайғамбарлық аса ауыр міндет болғандықтан) үйлену мәселесінде қиналып қалмауың үшін бір өзіңе ғана тән. Шүбәсіз, Алла өте кешірімді, ерекше мейірімді.

۞تُرْجِي مَن تَشَآءُ مِنْهُنَّ وَتُـْٔوِيٓ إِلَيْكَ مَن تَشَآءُۖ وَمَنِ ٱبْتَغَيْتَ مِمَّنْ عَزَلْتَ فَلَا جُنَاحَ عَلَيْكَۚ ذَٰلِكَ أَدْنَىٰٓ أَن تَقَرَّ أَعْيُنُهُنَّ وَلَا يَحْزَنَّ وَيَرْضَيْنَ بِمَآ ءَاتَيْتَهُنَّ كُلُّهُنَّۚ وَٱللَّهُ يَعْلَمُ مَا فِي قُلُوبِكُمْۚ وَكَانَ ٱللَّهُ عَلِيمًا حَلِيمࣰا

(Уа, Мұхаммед!) Әйелдеріңе кезекпен бару мәселесіне келсек, қайсыбірінің кезегін кейінге шегеріп, (құжырасына) кейін барсаң да, қайсысын кезегінен бұрын жаныңа шақырып алсаң да өз еркің. Сондай-ақ кезегін кейінге шегерген әйелдеріңнің қайсыбіріне ертерек баруды қалап, кезегін қайтадан алға шығарсаң да күнәға қалмайсың. Бұл олардың қуанышқа бөленіп шаттануы, (кезектері кейінге шегерілгенде) мұңаймауы үшін, сондай-ақ бәріне бірдей жақсы қарайтындығыңның арқасында барлығының да көңілдері хош әрі өзіңнен риза болуы үшін ең лайықты үкім. Алла жүректеріңдегінің бәрін біледі. Алла – Алим (бәрін білуші), Халим (құлдары қанша жерден күнәға батса да өте сабырлы, сондай жұмсақ).

لَّا يَحِلُّ لَكَ ٱلنِّسَآءُ مِنۢ بَعْدُ وَلَآ أَن تَبَدَّلَ بِهِنَّ مِنْ أَزْوَٰجࣲ وَلَوْ أَعْجَبَكَ حُسْنُهُنَّ إِلَّا مَا مَلَكَتْ يَمِينُكَۗ وَكَانَ ٱللَّهُ عَلَىٰ كُلِّ شَيْءࣲ رَّقِيبࣰا

Бұдан былай саған басқа әйелдермен некелесу, яғни, бұған дейінгі адал жарларыңа талақ айтып, көркіне қанша жерден тәнті болсаң да басқа әйелмен көңіл қосуды харам еттік. Алайда қол астыңдағы күңдеріңнің жөні бөлек. Алла барлық нәрсені толық бақылап тұрушы.

يَٰٓأَيُّهَا ٱلَّذِينَ ءَامَنُوا۟ لَا تَدْخُلُوا۟ بُيُوتَ ٱلنَّبِيِّ إِلَّآ أَن يُؤْذَنَ لَكُمْ إِلَىٰ طَعَامٍ غَيْرَ نَٰظِرِينَ إِنَىٰهُ وَلَٰكِنْ إِذَا دُعِيتُمْ فَٱدْخُلُوا۟ فَإِذَا طَعِمْتُمْ فَٱنتَشِرُوا۟ وَلَا مُسْتَـْٔنِسِينَ لِحَدِيثٍۚ إِنَّ ذَٰلِكُمْ كَانَ يُؤْذِي ٱلنَّبِيَّ فَيَسْتَحْيِۦ مِنكُمْۖ وَٱللَّهُ لَا يَسْتَحْيِۦ مِنَ ٱلْحَقِّۚ وَإِذَا سَأَلْتُمُوهُنَّ مَتَٰعࣰا فَسْـَٔلُوهُنَّ مِن وَرَآءِ حِجَابࣲۚ ذَٰلِكُمْ أَطْهَرُ لِقُلُوبِكُمْ وَقُلُوبِهِنَّۚ وَمَا كَانَ لَكُمْ أَن تُؤْذُوا۟ رَسُولَ ٱللَّهِ وَلَآ أَن تَنكِحُوٓا۟ أَزْوَٰجَهُۥ مِنۢ بَعْدِهِۦٓ أَبَدًاۚ إِنَّ ذَٰلِكُمْ كَانَ عِندَ ٱللَّهِ عَظِيمًا

Уа, иман келтіргендер! Пайғамбардың құжыра-ларына рұқсатсыз кірмеңдер және пайғамбар үйіне ауқаттануға шақырылғандарыңда уақытынан ерте барып алып, астың пісуін күтіп отырмаңдар. Дастарханға шақырылғандарыңда ғана кіріңдер және тамақтанып болған соң әңгіме-дүкен құрып отырып алмай бірден тарап кетіңдер. Өйткені бұл қылықтарың пайғамбарды қапаландыруда, алайда ол сендерден ұялғанынан үндемеуде. Ал Алла ақиқатты ашып айтудан тартынбайды. Сондай-ақ егер пайғамбардың жұбайларынан сұрайтын нәрселерің болса, перденің ар жағында тұрып сұраңдар. Міне сол өздеріңнің де, олардың да жүректеріңнің тазалығы үшін ең лайықтысы осы болмақ. Сендердің Алла елшісінің көңіліне қаяу түсіруге қақыларың жоқ, сондай-ақ одан кейін оның пәк жұбайларымен әсте некелесе алмайсыңдар. Бұлай істеу, Алланың құзырында өте үлкен күнә болмақ.

إِن تُبْدُوا۟ شَيْـًٔا أَوْ تُخْفُوهُ فَإِنَّ ٱللَّهَ كَانَ بِكُلِّ شَيْءٍ عَلِيمࣰا

Қандай да бір нәрсені жария етсеңдер де, яки іштеріңе бүгіп қалсаңдар да (естеріңде болсын,) Алла барлық нәрсені білетін, шексіз ілім иесі!

لَّا جُنَاحَ عَلَيْهِنَّ فِيٓ ءَابَآئِهِنَّ وَلَآ أَبْنَآئِهِنَّ وَلَآ إِخْوَٰنِهِنَّ وَلَآ أَبْنَآءِ إِخْوَٰنِهِنَّ وَلَآ أَبْنَآءِ أَخَوَٰتِهِنَّ وَلَا نِسَآئِهِنَّ وَلَا مَا مَلَكَتْ أَيْمَٰنُهُنَّۗ وَٱتَّقِينَ ٱللَّهَۚ إِنَّ ٱللَّهَ كَانَ عَلَىٰ كُلِّ شَيْءࣲ شَهِيدًا

Егер пайғамбар жұбайлары әкелерімен (соның ішінде аталары әрі әкелері мен аналарының аға-інілерімен), өз ұлдарымен (һәм немерелерімен), аға-інілерімен, аға-інілерінің ұлдарымен, апа-сіңілілерінің ұлдарымен, өзге мұсылман әйелдер және кітап иелерінің ішіндегі өздерімен жақсы араласатын көркем мінезді әйелдермен, сондай-ақ қол астыларындағы күңдерімен пердесіз-ақ сөйлесетін болса, күнәға қалмайды. Сонымен қатар, (уа, Пайғамбардың пәк жұбайлары,) Алланы тиісінше тағзым етіңдер һәм Оған қарсы келіп, асылық қылудан барынша сақтанып тақуалық аясында өмір сүріңдер! Өйткені Алла барлық нәрсеге толық куә болушы.

إِنَّ ٱللَّهَ وَمَلَٰٓئِكَتَهُۥ يُصَلُّونَ عَلَى ٱلنَّبِيِّۚ يَٰٓأَيُّهَا ٱلَّذِينَ ءَامَنُوا۟ صَلُّوا۟ عَلَيْهِ وَسَلِّمُوا۟ تَسْلِيمًا

Расында, Алла (ең сүйікті құлы, пайғамбарлардың ең ардақтысы Мұхаммед) пайғамбарға үнемі шексіз нығметі мен рақымын төгіп, күннен күнге мерейін өсіруде. Ал Оның періштелері болса, ол үшін үнемі игі тілек тілеп, дұға етуде. Уа, мүміндер! Ендеше, сендер де оған шын жүректен салауат айтып, құрметпен сәлем жолдаңдар (яғни, оны шын жүректен ардақтап, оған Алланың рақымы мен есендігін тілеп, бар ықыластарыңмен дұға етіңдер және оған қалтқысыз мойынсұнған күйде сәлем жолдаңдар)!»

إِنَّ ٱلَّذِينَ يُؤْذُونَ ٱللَّهَ وَرَسُولَهُۥ لَعَنَهُمُ ٱللَّهُ فِي ٱلدُّنْيَا وَٱلْـَٔاخِرَةِ وَأَعَدَّ لَهُمْ عَذَابࣰا مُّهِينࣰا

(Аллаға, пайғамбарға және Ислам құндылық-тарына сөз әрі іс жүзінде қарсы келіп) Алланы және елшісін ренжіткендерді Алла бұл дүниеде де, ақиретте де рақымынан аластады һәм оларды қор қылатын азап дайындап қойды.

وَٱلَّذِينَ يُؤْذُونَ ٱلْمُؤْمِنِينَ وَٱلْمُؤْمِنَٰتِ بِغَيْرِ مَا ٱكْتَسَبُوا۟ فَقَدِ ٱحْتَمَلُوا۟ بُهْتَٰنࣰا وَإِثْمࣰا مُّبِينࣰا

Сондай-ақ мүмін ерлерді және мүмін әйелдерді (орынсыз сөздер әрі іс-әрекеттермен) нақақтан-нақақ ренжіткендер қып-қызыл жала жапқан һәм анық күнә арқалаған болады.

يَٰٓأَيُّهَا ٱلنَّبِيُّ قُل لِّأَزْوَٰجِكَ وَبَنَاتِكَ وَنِسَآءِ ٱلْمُؤْمِنِينَ يُدْنِينَ عَلَيْهِنَّ مِن جَلَٰبِيبِهِنَّۚ ذَٰلِكَ أَدْنَىٰٓ أَن يُعْرَفْنَ فَلَا يُؤْذَيْنَۗ وَكَانَ ٱللَّهُ غَفُورࣰا رَّحِيمࣰا

Уа, ардақты Пайғамбар! Жұбайларыңа, қыздарыңа және мүміндердің жұбайлары мен қыздарына: «(Үйлерінен шыққанда және бөтен ер кісілердің алдында жеңіл киімдерінің сыртынан) ұзын әрі кең киім кисін», – деп, айт. Бұл (олардың иманды да, арлы әйел баласы ретінде) танылуы (білінуі) һәм нақақтан-нақақ ар-намыстары тапталып, қорлық көрмеуі үшін қолға алынатын ең лайықты іс. Алла (мүміндерге) өте кешірімді, ерекше мейірімді.

۞لَّئِن لَّمْ يَنتَهِ ٱلْمُنَٰفِقُونَ وَٱلَّذِينَ فِي قُلُوبِهِم مَّرَضࣱ وَٱلْمُرْجِفُونَ فِي ٱلْمَدِينَةِ لَنُغْرِيَنَّكَ بِهِمْ ثُمَّ لَا يُجَاوِرُونَكَ فِيهَآ إِلَّا قَلِيلࣰا

Егер мұнафықтар, жүректерінде (рухани) дерт болғандар және (Исламның орталығы) Мәдина шаһарында (лаң салып, елдің шырқын бұзу үшін) сөз тасып, өсек баққандар мұндай теріс қылықтарынан біржола тыйылмаса, саған олардың үстінен билік жүргізуге пәрмен береміз. Содан кейін олар жаныңда ұзақ уақыт бола алмайды (яғни, көп ұзамай-ақ ерсі қылықтары үшін қуғын-сүргінге ұшырайды).

مَّلْعُونِينَۖ أَيْنَمَا ثُقِفُوٓا۟ أُخِذُوا۟ وَقُتِّلُوا۟ تَقْتِيلࣰا

Ондайлар Алланың рақымынан біржола қуылғандар. Олар қай жерде ұшырасса, бірден тұтқындалады және өздеріне лайықты түрде өлтіріледі.

سُنَّةَ ٱللَّهِ فِي ٱلَّذِينَ خَلَوْا۟ مِن قَبْلُۖ وَلَن تَجِدَ لِسُنَّةِ ٱللَّهِ تَبْدِيلࣰا

Алланың бұдан бұрын өткен барлық қауымдарға қатысты айнымас заңы да, ісі де осындай болған. Алланың заңынан ешқандай өзгеріс таппайсың!

يَسْـَٔلُكَ ٱلنَّاسُ عَنِ ٱلسَّاعَةِۖ قُلْ إِنَّمَا عِلْمُهَا عِندَ ٱللَّهِۚ وَمَا يُدْرِيكَ لَعَلَّ ٱلسَّاعَةَ تَكُونُ قَرِيبًا

Адамдар сенен қиямет-қайымның уақытын сұрайды. Оларға: «Ол жайлы нақты мәлімет Алланың құзырында», – деп, айт. Қайдан білесің, бәлкім, оның уақыты таяп та қалған шығар!

إِنَّ ٱللَّهَ لَعَنَ ٱلْكَٰفِرِينَ وَأَعَدَّ لَهُمْ سَعِيرًا

Расында, Алла кәпірлерді рақымынан мәңгілікке аластады және олар үшін жалын атқан жаһаннам отын дайындап қойды.

خَٰلِدِينَ فِيهَآ أَبَدࣰاۖ لَّا يَجِدُونَ وَلِيࣰّا وَلَا نَصِيرࣰا

Олар онда мәңгі-бақи қалады, сондай-ақ олар өздеріне қамқор болатын ие де, қол-ұшын берер жәрдемші де таба алмайды.

يَوْمَ تُقَلَّبُ وُجُوهُهُمْ فِي ٱلنَّارِ يَقُولُونَ يَٰلَيْتَنَآ أَطَعْنَا ٱللَّهَ وَأَطَعْنَا ٱلرَّسُولَا۠

Жүздері (һәм тұла бойы бейне бір істікке шаншылып отқа қақталған еттей) ары-бері аударылып-төңкеріліп тозақ отына қақталатын күні олар: «Қап әттеген-ай, Аллаға мойынсұнғанымызда ғой, пайғамбарға қалтқысыз бағынғанымызда ғой», – деп, аһ ұрады.

وَقَالُوا۟ رَبَّنَآ إِنَّآ أَطَعْنَا سَادَتَنَا وَكُبَرَآءَنَا فَأَضَلُّونَا ٱلسَّبِيلَا۠

Сондай-ақ олар: «Уа, Раббымыз! Анығында, біз (діннен безген) басшы-көсемдеріміз бен ұлықтарымызға бағындық, сөйтіп, олар бізді тура жолдан адастырып жіберді».

رَبَّنَآ ءَاتِهِمْ ضِعْفَيْنِ مِنَ ٱلْعَذَابِ وَٱلْعَنْهُمْ لَعْنࣰا كَبِيرࣰا

«Уа, Раббымыз! Оларға екі есе ауыр азап тартқыз. Оларды рақымыңнан (ендігәрі үміт ете алмайтындай етіп) мүлдем аластап жібер!» – деп айтады.

يَٰٓأَيُّهَا ٱلَّذِينَ ءَامَنُوا۟ لَا تَكُونُوا۟ كَٱلَّذِينَ ءَاذَوْا۟ مُوسَىٰ فَبَرَّأَهُ ٱللَّهُ مِمَّا قَالُوا۟ۚ وَكَانَ عِندَ ٱللَّهِ وَجِيهࣰا

Уа, иман келтіргендер! (Алла елшісіне қарсы келу арқылы) Мұсаға орынсыз жала жауып, көңіліне қаяу түсірген бейбақтарға ұқсап жүрмеңдер. Біле білсеңдер, Алла қауымының ол жайлы айтқан қауесет сөздерінің қып-қызыл жала екенін айқындап, оны толық ақтады. Ол Алланың алдында өте абыройлы еді.

يَٰٓأَيُّهَا ٱلَّذِينَ ءَامَنُوا۟ ٱتَّقُوا۟ ٱللَّهَ وَقُولُوا۟ قَوْلࣰا سَدِيدࣰا

Уа, иман келтіргендер! Ендеше, Алладан лайықты түрде қорқып, Оған қарсы келуден әрі азабынан барынша сақтаныңдар және әрдайым жібі түзу сөз айтыңдар!

يُصْلِحْ لَكُمْ أَعْمَٰلَكُمْ وَيَغْفِرْ لَكُمْ ذُنُوبَكُمْۗ وَمَن يُطِعِ ٱللَّهَ وَرَسُولَهُۥ فَقَدْ فَازَ فَوْزًا عَظِيمًا

Сол арқылы Алла істеріңді түзу қылып, күнә-қателіктеріңді кешірсін. Кімде-кім Аллаға және елшісіне қалтқысыз бағынса, зор бақытқа, толайым табысқа жетері сөзсіз.

إِنَّا عَرَضْنَا ٱلْأَمَانَةَ عَلَى ٱلسَّمَٰوَٰتِ وَٱلْأَرْضِ وَٱلْجِبَالِ فَأَبَيْنَ أَن يَحْمِلْنَهَا وَأَشْفَقْنَ مِنْهَا وَحَمَلَهَا ٱلْإِنسَٰنُۖ إِنَّهُۥ كَانَ ظَلُومࣰا جَهُولࣰا

Расында, біз аманатты (яғни, өз еркімен Аллаға лайықты құл болу сынды үлкен жауапкершілікті) жеті қат көкке, жерге және тауларға (мойындарыңа алыңдар деп) ұсындық. Алайда олар оны мойындарына алудан қашты, оның ауыр жауапкершілігінен қорықты. Сөйтіп, оны адам баласы өз мойнына алды. Шүбәсіз, адам баласы тым залым (яғни, әділдікке қас, қателікке, күнәға жақын һәм жауапсыз келеді) әрі өте надан (ақиқаттан бейхабар, ғапыл, парықсыз һәм нәпсісіне ергіш) келеді.

لِّيُعَذِّبَ ٱللَّهُ ٱلْمُنَٰفِقِينَ وَٱلْمُنَٰفِقَٰتِ وَٱلْمُشْرِكِينَ وَٱلْمُشْرِكَٰتِ وَيَتُوبَ ٱللَّهُ عَلَى ٱلْمُؤْمِنِينَ وَٱلْمُؤْمِنَٰتِۗ وَكَانَ ٱللَّهُ غَفُورࣰا رَّحِيمَۢا

Нәтижеде Алла мұнафық ерлер мен мұнафық әйелдерді және мүшрік ерлер мен мүшрік әйелдерді азаптайды. Сондай-ақ Алллаһ мүмін ерлер мен мүмін әйелдердің тәубелерін қабыл етіп, оларды ерекше рақымына бөлейді. Шүбәсіз, Алла өте кешірімді, (әсіресе, тәубеге келіп, Өзіне бет бұрған мүмін құлдарына) ерекше мейірімді.